2025 F1 日本大奬賽 : 角田裕毅主場首戰「甜酸交雜」：排位失誤累事 長距離激戰學到嘢！

作者 : Galen Chan

圖片 : 網上圖片

角田裕毅（Yuki Tsunoda）上週以紅牛正選車手身份主場出擊，最終以第12名衝線後大嘆「甜酸交雜」！呢位24歲車手由RB車隊升呢接替Liam Lawson，今場鈴鹿激戰本被寄予厚望，點知關鍵排位賽Q2止步，正賽雖追前三位仍無緣積分區。

「排位Q2嗰個甩尾真係抵打！」角田賽後自責。事實佢喺三節練習賽都保持頭十快速，點知排位賽最後一搏喺1號彎跣胎，搞到僅列第15起步（後因Carlos Sainz罰退升一位）。雖然正賽接連爬過舊隊友Pierre Gasly同Liam Lawson，但全程被車龍困住，最終落後冠軍隊友Max Verstappen 58秒完賽。

「至少想攞分啊......」角田苦笑話主場作戰一年得一次確係壓力爆煲，但強調53圈激戰學到嘢：「長距離節奏掌握進步咗，尤其係輪胎管理，下次再嚟過！」紅牛顧問Helmut Marko亦畀面大讚：「除咗排位失誤，佢同韋少圈速只差0.2至0.3秒，合格有餘！」

今場「地元デビュー戰」雖未竟全功，但角田展現嘅速度已令紅牛高層眼前一亮。隨住賽季進入歐洲戰線，呢位本田系車手能否把握機會上位，勢成日本車迷焦點！
#日本狼の野望 #紅牛青訓生死鬥